中環出更：部門互推波 大埔區會狙擊山竹遺禍
去年九月中山竹襲港，政府被鬧爆善後工作應對無方，事隔三個半月，山竹遺禍陸續消散，惟政府部門嘅權責不清，互相推卸責任，建制、泛民區議員繼續鍥而不捨追究問責，來自建制及泛民嘅大埔區議員分別發信促大埔區議會開會討論山竹嘅善後措施，據悉新一年終於排上議程，最快明日開會討論事件。
泛民大埔區議員任啟邦透露，大埔區會原本去年十一月討論山竹遺禍，但政府前線人員當時仍然忙於善後工作，故留待今次會議先傾。
市民投訴 踢極唔郁
任又話山竹襲港，令區內多處有塌樹，部分鄉郊地方事隔多時都冇人清理，影響居民返工返學，市民打電話去政府部門投訴仍「踢極唔郁」，反映部門權責不清，最終市民自行清理，但「食環署連垃圾袋都唔肯畀」，佢希望透過今次會議商討，各部門放下門戶之見，日後再遇到呢啲情況時動員能力可以快啲。
除咗六名泛民大埔區議員促請政府成立專責小組，檢討風災前後嘅預防、善後同協調工作，大埔區議會主席張學明等十三名建制派大埔區議員則去信政府，要求政府加強負責樹木管理部門協調合作，同時通過立法賦權特首在自然災害後市面仍未恢復正常下，將某個日子或時段指定為「特殊情況時期」，以保障勞工權益。
卓妮