政情：鐵血車手 推廣運動靠把口
有「鐵血車手」之稱退役香港單車運動員黃蘊瑤（Jamie）退役三年，之前去咗讀書進修，之後就喺一間外國品牌公司擔任首席營運長，負責推廣兒童平衡車運動。Jamie話，退役後做過唔同工作，但始終都想從事同運動有關嘅工作，又話以前係靠對腳同個腦，依家就要靠埋把口，所以初初返工時都有啲唔慣。
Jamie早排接受訪問時講到退役後嘅生活，話退役初期佢讀咗個體育行政管理課程同兒童遊戲治療師課程，亦試過寫專欄、做產品代言人同喺電視台及電台做主持，但兜兜轉轉，始終想做同體育相關嘅工作，於是就做咗依家呢份工，負責推廣兒童平衡車運動兼籌辦訓練班、搞比賽，有時仲要帶學員去海外參賽。
留喺內地多過香港
Jamie又話，依家深圳福田係佢主要工作據點，留喺內地嘅時間仲多過香港，不過佢好快就適應內地生活，因為以前做運動員時，一年平均都只係得三十日時間留喺香港，所以喺香港以外工作都唔成問題咁話。