政情：朱鼎健：年輕人搞年宵 搵工易啲
仲有約一個月就農曆新年，經營年宵市場嘅商販踏入準備階段。香港中文大學校董朱鼎健話，特別欣賞年輕人參與經營年宵攤檔，因為由攤位競投、產品設計、生產、物流同銷售都係要一手一腳親自操刀，幹勁十足之餘又肯放下身段，將來喺職場上必定具競爭力。佢仲鼓勵喺年宵擺檔嘅年輕人，話年宵市場新奇得意嘅賀年物品唔止吸引眼球，得來嘅社會經驗仲會令佢哋更易受僱主青睞喎。
朱話，初出茅廬嘅學生哥最大競爭者往往係自己同學，要突圍而出就要累積社會經驗，趁住假期做暑期工或做兼職都係體驗社會運作嘅途徑。雖然佢喺加拿大求學，未試過喺年宵市場擺檔，不過就曾經喺博覽會做翻譯同喺酒樓做兼職，令佢對社會加深接觸，對後來嘅事業發展仲有幫助添。
曾幫社區清積雪當操肌
佢又話，學生時代做嘅臨時工或兼職或會比較沉悶，不過只要向好嘅一面諗就會開懷，佢仲自爆試過幫社區清理積雪，極費氣力，但一諗到可以鍛煉肌肉，工作就特別起勁，真係搞笑。