政情：邵家臻鬍鬚 嚇走細路女
細路女驚嘅嘢有時都幾一致，社會福利界立法會議員邵家臻早排出席一個有關劏房戶嘅活動，愛心爆棚咁想氹一個小妹妹玩，點知一抱起嗰個妹妹，妹妹就掙扎逃走，場面都幾尷尬。邵話，其實佢不時都遇到呢個情況，懷疑啲小妹妹可能係怕佢啲鬍鬚。佢仲即場測試，叫現場另外兩個小妹妹試下摸佢啲鬚，點知冇人敢摸，就連行近啲都唔肯，睇嚟鬍鬚真係可以令小妹妹嘅恐懼指數爆燈。
兒時蝸居細單位 明瞭劏房戶
邵喺當日活動中，對點樣喺狹窄環境下擺傢俬相當熟手。佢就話雖然未住過劏房，但都係「公屋仔」，一家五口住喺一個二百幾平方呎嘅單位，佢同哥哥、弟弟全部都要瞓廳。
佢又話，因為小時候居住環境擠迫，喺屋企溫書又好嘈，為咗屋企人唔使連電視都冇得開，佢就會去自修室溫書，等到凌晨家人瞓晒，先再返屋企個細騎樓繼續溫習，而佢細個最大嘅願望就係有張屬於自己嘅書枱。以前住公屋，依家又不時探訪基層，難怪佢都話好明白劏房戶嘅居住環境真係好慘喇。