中環出更：議員冇手尾 卿姐呻「環保班長」冇人接棒
前立法會議員劉慧卿（卿姐）離開議會兩年多，尋日佢就點名鬧爆資訊科技界立法會議員莫乃光（Charles）同會計界立法會議員梁繼昌（Kenneth），到底佢哋兩個衰乜嘢，搞到卿姐咁嬲呢？原來係衰冇手尾！
自稱「環保班長」嘅卿姐尋日出席一個環保活動，佢就大翻舊帳話當年喺立法會成日逐間房巡，發現唔少人都好冇手尾，經常唔熄冷氣、電視同燈。不過在場就有市民唔信，仲反問卿姐「你講呀？」與卿姐同屬民主黨嘅立法會議員林卓廷就挺身而出做人證，話Charles曾經講過，由佢接替卿姐任議員，萬一唔記得熄燈都唔會再畀人鬧得咁緊要，直認曾經被卿姐鬧過。
莫乃光梁繼昌被鬧唔熄燈
卿姐聽完都話，Charles同Kenneth成日喺立法會開會時開咗燈唔熄就走咗去，而佢開緊會又唔方便走去佢哋個位熄燈，惟有叫立法會管事出手。佢又大嘆花咗四年時間都培養唔到啲人熄燈嘅習慣，依家佢都睇唔到有人勝任「環保班長」接班人喇，就連向來被視為其接班人嘅林卓廷都做唔到。點解咁講？因為卿姐話依家立法會入面，好多房間冇人用都依然燈火通明喎。
卓妮