中環出更：謝景霞：化妝習慣要由細養成
化妝可以令人靚啲，睇落精神啲，唔少人更視化妝係一種禮貌。化粧品同業協會早前舉行晚宴，協會理事長謝景霞就話，化妝習慣要由細養成，而出席晚宴嘅批發及零售界立法會議員邵家輝就自爆不時都會敷吓面膜，甚至去過美容院添。邵話，現今社會十分注重儀容，化妝品不論對男士或女士嚟講都好重要，直情係都市人嘅必需品喎。
邵嘅「美容之路」來自朋輩影響，後生時見到朋友敷面膜，佢又敷埋一份。佢又話自己皮膚屬油性，敷完面膜會乾淨啲，自此仲學識用洗面梘同洗面膏。佢又曾經為撐朋友場而去美容院，不過間美容院只招待女賓，好彩佢獲安排獨立房間，先唔驚尷尬。
鄺美雲教養顏靠瞓足覺
同場嘅仲有餐飲聯業協會青委會主席陳浩弘，雖然佢冇特別護膚，但自言非常姿整，出門前一定要用半個鐘執靚個樣，而為咗皮膚好，佢亦戒咗食牛。而謝就解釋，化妝習慣應該由細養成，係因為咁就可以早啲揀到啱自己嘅化妝品喇。
香港珠海社團總會會長鄺美雲（Cally）亦分享美容心得，話落妝唔可以懶，一定要清潔乾淨，面膜就最多敷二十分鐘就夠。佢又話，睡眠係美容重要一環，每日要瞓八個鐘，幾忙都至少要瞓足六個鐘，仲要十分注重飲食，早餐多食水果吸收糖分以應付日間工作，午餐同晚餐就唔好食咁多。難怪佢多年嚟都好似「凍齡」咁。
從事美容業逾五十年嘅「美容教母」鄭明明都在場，佢都十分支持Cally嘅飲食理論，而佢自己更係晚上七時之後就唔食飯，仲會每周跳兩次拉丁舞。鄭又話自己會喺沖涼時順便敷埋面膜，真係識慳時間啦。
卓妮