政情：沈祖堯接棒林超英做環運會主席

香港中文大學前校長沈祖堯冇做校長之後，就喺威爾斯親王醫院做醫生睇症，尋日佢就被政府委任為環境運動委員會主席，任期由下月一日起，至二○二○年十二月三十一日結束。而現任環運會主席、天文台前台長林超英就會喺任期屆滿後離任。而林就話，希望沈可以諗多啲橋，化知識為行動喎。

林由二○一三年起已出任環運會主席，之後兩次連任，總共做咗六年主席。雖然即將卸下環運會工作，但佢就話環保工作永遠都做唔完，希望沈可以繼續推動環運會工作。佢又話沈做過校長，有教育方面嘅工作經驗，望對方可以諗多啲橋，化知識為行動。

政府尋日亦公布新一屆環運會成員，其中許湧鐘連任副主席，另有十七名委員，當中有十人為新任委員，當中包括陳家強、莊偉茵、李進秋。而沈同時亦被委任為環境及自然保育基金委員會委員，任期都係明年一月一日開始，為期兩年。