中環出更：易志明任監警會副主席 中立性惹疑
政府尋日公布獨立監察警方處理投訴委員會委任名單，今次名單委任咗身兼全國政協嘅自由黨立法會議員易志明，出任委員會副主席一職，任期會由明年一月一日開始，為期兩年。而現任委員、保險界立法會議員陳健波，將會喺本月底嘅任期屆滿後離任。有議員就關注易志明的背景，質疑監警會嘅中立性。
鄭松泰：監察警權形同虛設
今次政府唔止委任新副主席，名單上亦委任咗兩名新成員，分別係身兼大律師嘅保安及護衞管理委員會主席羅孔君及理文造紙首席執行官李文斌。除咗新面孔，今次政府亦再度委任金融服務界立法會議員張華峰，以及建築、測量、都市規劃及園境界立法會議員謝偉銓做副主席，另外亦有十三位現任成員再度委任，全部任期同樣係兩年。
立法會議員鄭松泰就話，基於近幾年嘅政治原因，本身監警會嘅中立性已備受質疑，依家仲要委任埋易志明做副主席，覺得監警會嘅中立性會受影響。佢仲話，現時出任監警會嘅立法會議員，清一色全部都係身兼全國政協，佢形容，三人背景均屬「政治正確」，認為日後監察警權會變相形同虛設。
卓妮