中環出更：工展會美食當前 肥老闆：戇居先戒口
金融服務界立法會議員張華峰（肥老闆）為議會中「重量級」人物，曾經講過人生得食嘢一個興趣，堅決唔戒口，尋日佢去行工展會，見到美食當前果然完全冇停口，好似要證明自己冇講大話咁。佢仲話，香港咁多美食，戇居先戒口喎，真係為食到出晒面。
肥老闆尋日同一班朋友行工展會，身形分量十足嘅佢成為重點推銷對象，果仁、蜜糖、鮑魚等佢都試勻晒，而且食完仲有幫襯，可以話滿載而歸。卓妮仲聽聞佢花咗近五千元買鮑魚，非常豪氣。
盧偉國即場教焗腰果
工程界立法會議員盧偉國都在場，佢就分享童年回憶，話以前生得細粒，所以每次逛工展會都騎住爸爸膊頭，而最有印象嘅就係以前工展會嘅口號好生鬼，就算長大後都仲記得。而廚藝了得嘅佢就即場教點樣自家製焗腰果，話用焗爐整嘅腰果夠健康，但佢見到有現成芥辣味腰果賣時都忍唔住入貨，認真搞笑。
香港菁英會榮譽主席梁宏正同副主席林凱章都有入場。自爆今次係第一次行工展會嘅梁宏正更主動為爸爸、立法會主席梁君彥拎住戰利品。雖然佢發現爸爸所買嘅食品都係媽媽所愛，但佢就冇偷師，原來係因為聖誕節同太太食得太多，所以要減磅喎。
工展會由香港中華廠商聯合會主辦，一眾廠商會成員都現身，包括會長吳宏斌、副會長史立德同代表廠商會嘅工業界議員吳永嘉(Jimmy)。Jimmy就話，近年多咗人入場買夾萬，估計係因為多咗家庭聘請外傭，所以需求增加。不過佢就話，通常貴重嘢唔會放屋企，仲搞笑地建議不如放個哈哈笑公仔入夾萬整蠱人喎。
卓妮