全城狂轟律政司司長鄭若驊放大假避風頭，拒就唔告前特首梁振英UGL案公開解畫，直至尋日中午，鄭若驊返港後終於現身，惟死雞撐飯蓋愈解愈亂，宣稱案件涉及律政司同事才須外判，死撐律政司於UGL案做法係不偏不倚，最少兩度公開反問「點解要尋求多一個法律意見」，自吹自擂現行做法係「有擔當」。其實事實擺在眼前，前特首曾蔭權瀆職案等多名前高官案件，律政司均有尋求外間法律意見才作決定，鄭若驊今次愈描愈黑，一係唔熟書，一係擘大眼講大話嘞！
