政情：蔣麗芸養狗 甘心做工人
立法會議員蔣麗芸（Ann）喺議會出名夠硬淨，鬧人聲大大冇有怕，但作為愛狗之人，Ann面對可愛嘅狗仔時就即刻放軟聲線，仲話甘心做狗仔嘅工人添。
要有心理及實物準備
近年狗奴貓奴愈嚟愈多，Ann亦係其中之一，佢仲趁假期一連兩日喺網上分享幾十年來嘅養狗心得。養狗第一步就係揀養咩品種，Ann就話，除非養狗嘅目的係看門口或者住新界地方夠大，否則就應該養中、小型犬。佢仲硬銷自己養嘅貴婦狗，大讚呢個品種少體味同少甩毛。至於太迷你嘅犬種，佢就認為佢哋抵抗力比較弱，所以唔建議養狗新手飼養喇。
Ann又話，養狗要有兩大準備，一係心理準備，二就係實物準備。佢仲喺片中羅列各種狗狗用嘅梳、鬚刨、鉸剪、大咕o臣等工具同玩具。佢話呢啲工具對處理狗毛同爪係好重要，仲提醒要用牙刷幫狗仔刷牙。而Ann對狗帶亦都好有要求，推薦咗一款避免箍頸嘅狗帶。Ann對狗狗真係無微不至，作為狗狗「工人」可謂非常盡責。