政情：遊台不忘環保 譚凱邦籲勿放天燈
放天燈係唔少港人去台灣旅行嘅指定行程，環保觸覺義務總幹事譚凱邦（Roy）最近遊台時，見到成個天都係天燈，望番落地發現附近嘅樹上、農田同路邊都布滿天燈「屍骸」，就喺社交平台提醒大家，話天燈會引嚟環境污染同火災，呼籲唔好再放天燈。真係連去旅行，都不忘呼籲大家要環保。
Roy近日同太太去被佢形容為「家鄉」嘅台灣旅行「叉電」，兩人仲到咗位於台北平溪線嘅十分，呢度最出名就係放天燈喇。不過Roy就話，佢每分鐘都見到有幾個天燈升上天，成個天空都布滿天燈，一般遊客見到或者會覺得好靚，但佢就擔心天燈會引起火災，呼籲唔好再放天燈。天燈雖然係當地傳統文化，但都有台灣居民擔心天燈影響環境，傳統文化同環保兩者要取得平衡，真係唔容易。
話淡海輕軌感覺似輕鐵
另外，Roy又喺新北市試搭咗啱啱先通車嘅淡海輕軌，佢就話係順便考察一下，覺得好似香港嘅輕鐵咁喎。佢仲提醒朋友，話台灣環境較香港靜好多，所以去到台灣講嘢唔好咁大聲，以免影響到人喇。