中環出更：陳沛然踢爆陳凱欣開會坐唔足
立法會議員陳凱欣出任食物及衞生局局長政治助理時，曾經喺社交網站同醫學界立法會議員陳沛然（Pierre）公然開拖，對於Pierre喺網上發貼質疑時任食衞局局長高永文未能即時回應議員提問，話︰「會議超過一小時，片段只有三分鐘，你喜歡怎樣形容也可以。」依家陳凱欣成為立法會議員，Pierre就話陳凱欣開會都冇開足全程，直言︰「咁依家佢都坐唔足o架啦，你諗吓，佢換轉身份」，擺明抽後腳。
話兩人完全冇尷尬
不過Pierre之後就話，議員要兼顧好多工作，真係好難坐足全部會議，而佢同陳凱欣相識多年，上次社交網站事件只係好少事，二人事後完全冇尷尬，而陳凱欣當選後都有同佢打招呼。
雖然工作忙碌，但Pierre認為作為醫學界議員應保留公立醫院醫生身份，即使好多人都以為佢兼顧唔到議員同醫生工作，但佢從來冇考慮過放棄做醫生，因為「議員唔會做一世o架嘛，但係醫生做一世o架嘛，本業好緊要」。
卓妮