中環出更：愛心獎頒獎禮 簡文秀王文淵細數兩代情
港澳台灣慈善基金會主辦嘅第十三屆愛心獎早前舉行頒獎典禮，今屆共有七位愛心楷模獲獎，包括台灣第一名模林志玲、名醫凌鋒及陳榮基，仲有享譽國際嘅聲樂家簡文秀等，令人耳目一新。曾獲愛心獎嘅台灣工業總會理事長王文淵特別由美國趕嚟頒獎，佢講笑話，本來基金會建議佢作為某人嘅頒獎嘉賓，但對方太高，要抬頭先望到，所以自己就建議不如頒獎畀簡文秀。唔知佢係咪講緊默默做咗好多善事嘅志玲姐姐呢？
為慈善而唱嘅簡文秀唔介意執二攤，仲笑住細數同屬於台灣望族嘅王家兩代情。事關當年佢去外國讀書時，王文淵爸爸王永在每年都畀獎學金佢，畢業後亦好提攜佢。而今次係台北科技大學校長王錫福推薦佢參選，咁啱佢老公、全球知名LED光電製造廠老闆葉寅夫係校友，所以王錫福同校友們專程組團嚟打氣，令佢好感動。
已故民政事務局前副局長許曉暉（Florence）嘅丈夫翟普都有現身，事關Florence做咗多屆愛心獎評委，遺願之一係希望老公繼續關注愛心獎。翟普話，佢特登喺基金會名下設立一個以愛妻為名嘅紀念基金，望延續佢對社會嘅關懷。有「私人貸款之父」之稱嘅基金會總理張炳煌都好支持，仲率先捐助，希望起到拋磚引玉嘅作用。
女高音林爾琪獻唱 聽出耳油
當晚出席嘅仲有曾獲愛心獎嘅國際公益學院董事長馬蔚華，結果係佢負責頒獎畀林志玲。創辦愛心獎嘅基金會創會主席林添茂嘅家人亦一齊出動支持，佢嘅孫女、曾獲多項世界大獎嘅小女高音林爾琪仲喺晚會中獻唱，令人聽出耳油。
卓妮