政情：公民講場：否認重置展亮黑箱作業 羅致光：箱入面冇嘢

政府早前宣布打算於觀塘展亮技能發展中心現址建公務員學院，外界就閙爆政府霸靚地、逼走學生，勞工及福利局局長羅致光更被批評遲遲都唔肯交代中心搬遷細節。政府被鬧完一輪，先至擠牙膏咁話會原區重置中心，但新中心面積或會比原址細，畀市民大鬧「黑箱作業」。羅尋日出席電台節目時就否認「黑箱作業」，聲稱係因為個政策未完全拍板，「個箱入面根本冇嘢」，所以先畀人感覺吞吞吐吐喎。政府公布政策前應該先做好準備工夫，乜都未準備好就講定先，難怪市民覺得政府成日「擠牙膏」喇。