政情：嫌立會電腦舊 陳凱欣急急買過部
立法會議員陳凱欣上任近一個月，其立法會辦公室亦已由暫用嘅立法會大樓十樓陸續搬往六樓。雖然佢嘅辦公室啱啱先有傢俬，仲有好多嘢未準備好，連寬頻都未處理，但佢就已經急急買咗新電腦喇，原來係因為立法會提供嘅電腦太舊，仲用緊廿年前嘅視窗，所以只好買過部喇。
沙士時期文件唔捨得掉
陳日前就喺立法會辦公室執文件，佢話有堆舊文件一直唔捨得掉。原來就係佢喺○三年沙士時儲落嘅地圖、風向等資料同埋醫生履歷，佢話，以前上網搵資料冇咁方便，呢堆文件係當年研究沙士疫情時好辛苦儲落，之後無論做咩工作佢都唔捨得掉。
被問到會唔會開設地區辦事處，陳就話要喺九龍城、油尖旺同深水埗呢啲區新開一個地辦比較困難，因為好多屋邨都冇位，加上佢任期短，開屋邨辦事處需時，擔心開咗冇耐任期就完結，而且亦要計算好開支。佢正同團隊研究喺選區內搵啲獨立區議員或社區幹事幫手，睇吓可否落埋佢牌頭，不過最緊要都係先處理好立法會嘅事務喎。