政情：推廣工業安全謝偉銓「親歷」意外
香港基建發展蓬勃，地盤安全至關重要，點樣培養地盤工人嘅安全意識一直係業界目標。建築、測量、都市規劃及園境界立法會議員謝偉銓（Tony）為咗推廣工業安全意識，竟然親身「體驗」工業意外，真係嚇咗一跳。其實Tony係透過VR（虛擬實境）模擬地盤場景，去睇工業意外發生。佢玩完VR之後，都話對地盤安全入晒腦。
安全課題如果係書本或者上堂時提及，普遍都會變成沉悶嘅主題，Tony亦認同與其紙上談兵，不如親歷其境。之不過佢並非真係走入地盤，而係透過由政府委託香港大學研發嘅一個VR工業安全課程，走入虛擬場景去感受工業意外嘅可怕。
畀VR模擬高空工作嚇親
Tony事後喺社交網站上載試玩情況，只見佢玩到又踎低又不停揮手，都幾投入。佢話VR當中嘅場境好真實，「親眼」見到高空工作同吊運嘅工業意外時，自己都嚇一嚇。佢又認為近年政府係咁話要搞創科，其實政府喺地盤安全方面都可以多啲利用新科技咁話。