中環出更：留聲機勾起童 夢黃均瑜愛不釋手
香港善德基金會早前舉行一場以「懷舊香港」為主題嘅聖誕派對，現場有唔少仿古布置增添氣氛。香港教育工作者聯會會長黃均瑜一入場就被復古嘅大喇叭留聲機深深吸引，仲即刻拎起細心把玩，眼神情深款款咁。佢笑笑口話，細個時一直好想有一個咁樣嘅留聲機，但係買唔起，後來屋企終於有一部黑膠唱片機，不過係冇喇叭嗰種。難怪佢望住呢部留聲機時，好似見到夢中情人咁啦。
黃均瑜話，細個屋企環境唔好，乜都覺得貴，就算有留聲機之後，黑膠唱片都要同人借，記得當年第一張聽嘅係英文歌唱片，佢仲用嚟學英文添。
中華廠商聯合會會董黃偉鴻戴住黑超現身，以為佢扮緊邊個年份嘅飛仔，點知原來係眼角發炎，啱啱睇完醫生，為免被人望到佢眼紅紅，所以就夜麻麻都戴住黑超。講起童年夢想，佢笑稱一直想要意大利某牌子嘅超級跑車，近年佢嘅零食生意愈做愈旺，一年多前終於買咗，圓咗童年夢。
蕭何元鳳懷念少女時留短髮
當晚出席嘅女士們都悉心打扮，包括基金會主席董吳玲玲、副主席蕭何元鳳（Amy）、總理王陳鴛鴦及香港東區婦女聯會副主席何艷桃等。講起懷舊，Amy話最懷念留短髮嘅少女時代、當年同一班同學一邊踩單車，一邊傾偈返學嘅無憂歲月，一諗起就好開心、好嚮往咁話。
本身係理財策劃師嘅何艷桃最近有機會重返校園，不過唔係去做學生，而係獲山東濟南大學聘任為客座教授，佢笑笑口話好驚喜喎。
卓妮