政情：處理強積金對沖 勞顧會資方代表全留任
勞工顧問委員會每兩年換屆，繼上月經投票選出五名僱員代表後，六名資方代表人選同一名委任嘅僱員代表都喺尋日出爐，其中資方代表全部留任，以舊人上陣似乎實力更強。而有資方委員更承認，原陣過渡係為咗討論多時嘅取消強積金對沖制度議題。
合作多時 一埋位就合拍
政府尋日公布十二名勞顧會委員名單，資方六名代表均順利過渡，包括工業總會郭振華、中華廠商聯合會施榮懷、香港僱主聯合會麥建華、中華總商會何世柱、香港總商會于健安五名由僱主商會提名嘅代表，同埋由政府委任嘅中華總商會永遠榮譽會長張成雄。施承認，原陣過渡係為咗喺未來應付強積金對沖問題。佢哋六人合作多時，相信一埋位已經夠合拍。
反觀勞方代表，上月選出嘅五名代表只有三人係連任，捲土重來嘅香港公務員工會聯合會總幹事梁籌庭更係同其他工會關係一般，睇落勞方都有隱憂。不過今屆連任嘅勞方代表鄧家彪就話，雖然勞方代表換咗一半人，但都係有資深工會經驗同大家熟悉嘅人，所以都唔會輸蝕喎。