政情：李國章續任港大校委會主席
政府尋日刊憲宣布行政會議成員李國章續任港大校務委員會主席，任期三年，於明年一月一日起生效。港大校長張翔對李國章獲政府續任表示歡迎，又話李喺大學管治上給予卓越領導，定能推動港大於各領域發展，並作出重要貢獻。
林大輝坐正理大校董會主席
現年七十三歲嘅李國章過去三年出任校委會主席期間，曾經歷唔少風波爭議，其中最轟動係前年圍堵校委會事件，時任港大學生會會長馮敬恩於事發當日曾大叫「唔好畀李國章走，隊冧佢」等言論，事後被控刑事損壞及企圖強行進入等多罪，終被判處二百四十小時社會服務令。
至於理工大學校董會主席及浸大校董會主席亦換人，其中現任理大校董會副主席、前立法會議員林大輝「坐正」，明年開始出任主席一職，任期三年，而醫生李國祥則任理大校董會副主席；浸大校董會主席則由職業訓練局前主席陳鎮仁出任，政府另外委任多人加入浸大校董會，包括九龍社團聯會理事長王惠貞。