政情：搞青年工作「心虛」 唐英年又爆金句
前政務司司長唐英年向來「金句」多多，過去致詞演講「甩轆」事件一籮籮，而尋日又有「新猷」。佢今次以香港友好協進會訪京團團長身份作總結，竟然話會「心虛」繼續努力，搞咩咁戰戰兢兢呢？
相信係將虛心掉轉咗
唐英年尋日講到，有領導人叫佢哋做青年工作要加倍努力，令青年更認識國家，所以佢會「心虛」繼續努力喎。做正經事無理由會心虛，相信唐又講錯嘢，將虛心掉轉講，連意思都相反埋囉！
數番唐英年「甩轆」事件，最經典係出席「昂坪360」纜車開幕時，將「昂坪360」嘅「360」英文講成「三碌拎」，出席立法會會議時又形容遭迫遷酒店住客「吊吊揈」。而最近一次係今年五月，將上海復旦大學由右向左寫嘅校訓掉轉讀，變成「思近而問切，志篤而學博」。