政情：黃偉綸楊潤雄民望創新低放假 潛水避風頭
日前有民調指出，現屆政府十三名局長當中有七人民望創新低，當中包括發展局局長黃偉綸同教育局局長楊潤雄。以為佢哋見到咁嘅「成績表」就會勤力啲做嘢？咁就錯喇，佢哋反而係趁聖誕節呢個外遊高峰期放假。根據政府尋日嘅憲報，今個月就有四名局長輪流放假，黃偉綸同楊潤雄就係其中兩位。二人民望創新低都照樣放假，真係唔知佢哋視民望如浮雲，定係趁機避風頭喇。
香港大學民意研究計劃本周初公布最新調查結果，顯示律政司司長鄭若驊繼續喺三司中包尾，而十三名局長中更有七人民望創新低，當中包括黃偉綸同楊潤雄，佢哋兩個嘅支持率淨值為上任以來最低，分別為百分之二同負百分之十六，比上月嘅調查進一步下跌兩個百分點同三個百分點，真係低處未算低。
放唔夠一星期 眨吓眼要返工
有咗民望再創新低嘅經驗，黃、楊二人唔知係咪都明白到唔係一時三刻可以挽救到民望，所以就不約而同趁風頭火勢時放假出走，以免多做多錯再創新低咁失威。不過佢哋兩個放假都唔夠一個星期，真係眨吓眼又要返工面對現實，認真避得一時，避唔到一世。
而楊潤雄已經率先喺尋日開始放假，連放四日到下周二（18日）復工。黃偉綸就會喺下星期五（21日）起連放六日假，可以喺休假中過冬至同聖誕節，直至廿七號先返工。真係希望佢哋放假期間思考吓點樣提升民望，返嚟可以重新出發喇。
另外兩名趁聖誕佳節放假嘅局長就係環境局局長黃錦星同埋保安局局長李家超。黃錦星會喺平安夜即本月廿四日起連放八日假，除夕倒數完就會喺二○一九年元旦復工，唔知係咪因為忙住處理當局嘅垃圾徵費建議，所以先咁勤力趕住返工，連元旦都唔休假呢？
而李家超就喺下周三（19日）起放假，明年一月二日先復工，一共放十四日假，由聖誕節玩到去新年，認真識歎。聽聞佢將會去澳洲度過呢個悠長假期，似乎係想暫別一吓冬天，相信此行可以「叉足電」返嚟再搏殺。
副局長署任 工作中過聖誕新年
今次趁大時大節放假嘅官員全部都係一局之首，佢哋放假期間就會由當局副局長署任局長職務，幾位副局長睇怕都要喺工作中過節喇。