前特首梁振英UGL案拖拉多時，律政司終於明確答覆close file。係咯，告定唔告都係一句啫，交代清楚，有始有終，點都好過含糊其詞，模棱兩可，咁樣唔止折磨受害人，直情損害法治，無法無天吖。
都話官字兩個口，唔到你唔服。UGL案情節複雜，指控嚴重，反對派一直咬實唔放，仲走埋去外國告洋狀，律政司一樣一錘定音，話仔細考慮過相關資料後，認為冇足夠證據提出檢控喎，唔理你服唔服都好，起碼叫做有個交代。反觀漢奸黎恐嚇東方報業集團男記者案就唔同講法，唔理案情如何簡單，情節如何黑白分明，市民如何義憤填膺，律政司一律話之你死，告定唔告都冇一句，你吹得佢脹咩。
大家有眼見，漢奸黎恐嚇東方記者案已經事隔逾十八個月，東方及受害記者先後十一次去信詢問檢控進度，律政司依然大玩拖字訣，唔係話要徵詢法律意見，就係話不評論案件，擺明翹埋雙手睇你點死。正如學者話齋，複雜得多嘅UGL案尚且有個說法，一般恐嚇案頂多三個月已有定案，律政司咁都要死拖爛拖，應告唔告，係咪有雙重標準，背後係咪有不可告人嘅秘密，法律面前係咪人人平等，仲使問嘅。
其實理由好簡單，咪就係「凡東方必打壓，逢蘋果例免責」囉。歷年來，司法包庇縱容壹淫媒嘅黑歷史水蛇春咁長，觸犯淫審條例從輕發落唔在講，漢奸黎嘅政治黑金案「證據不足」獲放生，佔中案「證據太多」唔檢控，大宅僭建無人理，早就令人O晒嘴。恐嚇東方記者案有相有片鐵證如山，冇辦法搵藉口咯喎，咪惟有使出一招拖字訣，拖到你洩氣，拖到你死心。所以話，即使東方過千名編採員工同仇敵愾支持受害記者維權到底，但咁樣畀律政司玩殘法，都咪話唔心灰意冷，唔通真係要逼堅守愛國愛港立場嘅東方報業轉投反中亂港陣營，先至可以獲得律政司青眼有加？
冇計㗎喎，愛國從來冇好報，自古至今皆然。由比干被剖腹挖心，到伍子胥被賜劍自盡；由屈原自投汨羅江，到岳飛屈死風波亭，歷史不斷重演。鬼咩，港府充斥洋奴餘孽，司法刀把子掌握喺人哋手上，大大個免死金牌送畀漢奸黎，你咬佢食咩。不過咁，律政司可以隻手遮天，但堵唔住悠悠眾口，多個民調均顯示律政司司長鄭若驊民望「墊司底」，就知道市民眼睛雪亮。
一句到尾，告定唔告，點都要有個交代。只要律政司夠膽話畀大家知佢庇奸護淫，只要鄭司長夠膽承認充當漢奸黎嘅司法保護傘，愛國愛港人士咪知點做囉。