政情：劏房小組選主席鄭泳舜贏形勢尹兆堅博偷雞
香港土地供應不足兼建屋滯後，迫令唔少市民要住喺劏房等不適切房屋。立法會就成立「跟進本地不適切住屋問題及相關房屋政策事宜小組委員會（委員會）」，以探討如何拯救水深火熱嘅基層，委員會今日就會選主席。據了解，建制派由新丁民建聯（民記）鄭泳舜（Vincent）競逐主席，而民主派就由一手催生委員會嘅民主黨（白鴿黨）尹兆堅（肥尹）出戰，假如Vincent成功當選，就會係佢立法會生涯嘅零的突破，首次出任委員會主席嘞，但現實唔一定永遠盡如人意嘅！
話說早喺一六年，身兼房委會委員嘅肥尹就提出成立委員會，跟進劏房問題兼相關政策，但搞搞吓都要今個立法年度先成事。根據目前委員名單，合共有二十三名議員加入，建制與民主派十三對十，喺建制派大比數主導委員會下，牌面上肥尹當選嘅機會率低。
陳克勤勢保Vincent上寶座
有建制派人士透露，呢個委員會好搶手，唔少人都想做主席，而Vincent一直主打不適切房屋議題，所以大家有共識畀佢做，但為免甩轆，民記主席李慧琼同建制派副班長陳克勤都「落水」任委員，勢保Vincent坐上主席寶座。Vincent回覆時承認積極爭取，坦言九龍西區好多人住劏房，希望可以跟進不同範疇政策。
肥尹陣線難主導委員會
民主派方面，肥尹一早喺民主派會議表露心迹，希望一眾弟兄姊妹可以幫幫忙，可惜最後連埋自己都係得十人，未能主導委員會。佢回覆時都承認努力爭取中，直言委員會由自己搞出嚟，當然希望做到主席，惟牌面上看似冇得贏。
不過，有三名建制派議員同一名民主派議員已預告缺席，包括經民聯石禮謙、民記陳恒鑌同張國鈞，以及議會陣線朱凱廸，換言之建制與民主派變為十對九，如果有一名建制派甩底或遲到，就可能重演早前跟進元朗橫洲公屋發展項目小組委員會咁，要抽籤選主席，民主派或可再度「偷雞」。至於副主席一職，據悉建制派無討論過，但認為畀民主派做亦無所謂。
世事往往出乎所料，兩年前嘅肥尹又點會諗到，自己努力搭台後，竟然畀Vincent坐上去吖！究竟最後會有人甩轆，抑或Vincent可以有新的突破？就要各派造化喇！