中環出更：楊哲安買郵票對付野豬？
卓妮尋日喺中環遇到中西區區議會（山頂）區議員、教育局前政治助理楊哲安（Jeremy）喺郵局買郵票，仲話係用嚟「對付」野豬喎。咁都得？
Jeremy好氣憤話漁農署要文件交收，唔可以透過電郵處理，而山頂區內實在太多野豬出沒，署方又踢一踢先郁一郁，咪要買郵票寄文件要求處理囉！佢鬧爆漁護署聲稱冇人投訴，野豬少咗，實情係多到冇人敢出去行或跑步，希望依家擺籠可以捉到啲，冇病就送去遠啲地方先放生。雖然又忙又勞氣，但佢已準備好喺聖誕假期同屋企人再去新加坡玩，帶小朋友去主題樂園之餘順便可以抖吓。
講起旅行，卓妮早前都分別遇到名人周國豐（Brandon）同香港國術總會創會會長王嘉恩，佢哋喺呢個禮拜就會開聖誕Party，之後Brandon成家就飛去馬爾代夫玩喇！嗰日咁啱見到Brandon喺中環行街，睇完男士清潔用品又去睇模型，但好似揀嚟揀去都唔啱，但卓妮就聞到佢一身古龍水香味，佢就笑稱初中喺英國讀書時，見同學有噴自己又噴，久而久之啲女仔聞到味都知係佢嘞！
周國豐聖誕去馬爾代夫叉電
不過，Brandon大嘆工作壓力大，嚟緊聖誕假期唔想再去其他大城市行街，真係想好好休息吓，加上囝囝好鍾意玩水，所以決定舉家去馬爾代夫感受陽光與海灘叉電。可惜同樣忙嘅王嘉恩就話唔出埠嘞，直言工作太忙，兼且經常飛來飛去，難得有假期就決意留港休息喎。
卓妮