職場健康：未經訓練用鏈鋸 修剪樹木極危險
風災過後，看更阿明視察屋苑設備有沒有損毀時，發現其中一棵大樹的樹幹倒塌在行人道路上，阿明於是立即跑到工具房借工具。
阿明說：「阿文，我想借手鋸，路中心嗰邊被塌樹堵塞，我打算用手鋸將佢鋸走，免得途人為避開塌樹迫不得已走出馬路，構成危險。」阿文笑說：「講笑咋？你想鋸樹鋸到平安夜？呢度有鏈鋸，借你用啦！」
需戴保護裝備免受傷
碰巧，工作房主管全哥剛剛回來並說：「你哋千祈唔好擅自咁做，最近就發生咗幾宗關於操作鏈鋸不當引致嘅意外，不安全地操作鏈鋸可以引致嚴重受傷，甚至肢體傷殘。錯誤操作鏈鋸，有機會令到樹木或枝幹突然移動或爆裂和鏈鋸反彈，引致工友被樹木撞擊或鏈鋸所傷。鏈鋸操作員應該接受適當訓練，了解操作要訣同相應保護措施，例如必須雙手操作鏈鋸、測試鏈煞能否有效煞停鋸鏈，並於工作時佩戴合適個人防護裝備，好似安全帽連帽帶、面罩、護目鏡、護耳罩、鏈鋸手套、鏈鋸褲及安全鞋等。」
阿明及阿文恍然大悟地道：「原來操作鏈鋸係一門咁專業嘅學問。」全哥答： 「係呀，進行樹木修剪工作前，仲要進行風險評估，識別危險樹木及環境，確保工友喺安全環境下工作。其實職安局都有『安全使用鏈鋸』及『樹藝工作安全健康』課程畀有興趣人士報讀。我哋依家仲未受過相關訓練，應該通知樹藝專業人士跟進吧！」
職業安全健康局
www.oshc.org.hk