家陣電視台深夜重播一齣三十年前嘅經典劇集，當中講到主角一家由公屋搬上居屋，而當年一層居屋都不過廿幾萬啫。時移勢易，今時今日莫講話居屋中籤難過中六合彩，甚至連公屋都被炒至天價，呢三十年來物價飛漲咗幾多，一齣陳年舊劇已經話晒畀大家知。
講咁多，無非想講香港百物騰貴，通脹驚人，港產官僚吹噓嘅「自製長糧」年金計劃好睇唔好食，乏人問津就係咁解。數據顯示，登記認購年金嘅長者有九千四百多人，承購額不足預期一百億元嘅一半，仲要衰到有四成人登記後潛水或甩底，換言之，真正購買年金嘅長者得五千幾人咁大把。以全港過百萬名長者計算，認購比例之低，簡直要用慘不忍睹嚟形容。
可能終於知衰啩，年金公司尋日急忙宣布三大優化措施，包括百分百一筆過身故賠償，即不夠投保年期，身故長者嘅指定受益人亦可取回所有投保款項；投保上限由一百萬元倍增至二百萬，每月獲發嘅年金金額超過一萬元；設立特別款項提取以應付醫療及牙醫開支，相等於保費一半或上限三十萬元，年金亦會全年持續銷售。年金公司高層強調，推出優化措施係聽從民意，唔係救亡，真係信不信由你。
呢啲咪叫「早知今日，何必當初」囉。功夫茶早就指出年金計劃問題多多，第一大死症係回本期過長，最少十五年先至回本，長者隨時有錢冇命享；第二大死症係綁手綁腳，將大筆錢擺喺人哋嗰度，有急事用錢提早取回就要蝕本；第三大死症係冇計及通脹因素。今次優化措施係就係回應咗頭兩大死症，都叫做孺子可教，弊就弊在第三大死症始終搞唔掂喎。
咪睇當局胡吹年金計劃有四厘回報高過通脹，好似幾和味咁款，查實條數並唔係咁計。大家有眼見，三十年前一層居屋廿幾萬，三十年後平極都幾百萬，當中相差幾多倍？冇錯，本港樓價升幅脫離現實，難以比較，但家陣去快餐店食個晏仔，幾十蚊落樓閒閒哋，十幾廿年後係乜嘢光景，諗都諗得到，單靠每月些少年金養老，期間銀紙不斷貶值，你話唔係搵笨係乜吖。所以話，當局唔考慮通脹因素，搞幾多花臣都係嘥氣。
講到尾，可以攞一、二百萬購買年金嘅長者，生活點都叫做無憂，但基層長者就唔同講法。可惜吖，港府嫌貧愛富，年金又好，富貴長者屋又好，銀色債券又好，安老逆按揭都好，全部錦上添花，唔係雪中送炭。港府坐擁金山銀山，偏偏對老人家斤斤計較，一味推卸安老責任，家陣知道乜嘢叫為富不仁喇！