中環出更：盆菜宴無懼落雨 馮卓能：有我有好天氣
仁濟醫院連續第九年搞盆菜宴，早前筵開逾六百席仲破咗紀錄，逾六千人參加，不過咁多人喺戶外一齊食，一旦落雨咁點算呢？仁濟主席馮卓能就戲稱自己係福星，有佢喺度就有好天氣，話九屆盆菜宴中，佢只得一、兩屆唔在場，咁啱就係嗰一、兩屆遇到天雨，其餘都好順利，真係神奇喇！
副主席王賢訊都力撐馮係福星，事關佢試過同馮一齊去北京三日，到埗前一日當地都仲係好大霧霾，點知佢哋一去到就天朗氣清，到佢哋離開啲霧霾又出現番！所以佢話搞盆菜宴，只要有馮在場都安心咁話，而且好天氣佢先可以喺四方台一展歌喉！佢仲話如果場地安排得到，希望下年到佢做主席時，盆菜宴可以再擺多幾席添！唔知佢到時會唔會搵馮返嚟幫手呢？
蘇陳偉香：活動多有兩手準備
前主席蘇陳偉香同身為總理嘅女兒潘蘇凱欣都有嚟撐場，蘇陳偉香話仁濟同地區團體合作多年，好多嘢都已經有晒經驗，例如場地、人流、食物安全等，好似盆菜宴初初只係搞三百席左右，搞多幾年已經去到六百幾席喇！不過，蘇太話搞活動多數都有兩手準備，例如有一年遇到滂沱大雨，就即刻叫啲人拎個盆菜返屋企食，一樣冇問題。
盆菜宴嘅忠實支持者仲有總理孫蔡吐媚，佢年年都有參加，落大雨當年都喺度，仲話當時拎咗個盆菜返屋企之後，即刻打畀啲親戚朋友一齊過嚟食，雖然佢一家六口，但一個盆菜係畀十二人食嘅，而且人多熱鬧啲開心啲，咁咪叫齊人一齊食盆菜囉！
卓妮