中環出更：大學生玩塵爆 葉劉批通識科失敗
學校課程檢討專責小組正就通識教育科進行研究，預計喺明年向政府提交方向式建議。立法會議員葉劉淑儀尋日喺立法會上提出質詢，仲舉例指過去台灣亦發生過「塵爆意外」，但本港仍有大學生喺宿舍內玩塵爆，反映佢哋連普通常識都冇，更何況係通識，質疑政府會唔會承認推行通識科教育係失敗。
除咗質疑通識科教育失敗外，佢仲話通識教育科依家冇課本，政府並唔接受將相關課本送審，只靠老師下載資料做教材添！
楊潤雄：檢討冇預設立場
不過，民主黨（白鴿黨）議員許智峯就話通識科係塑造學生嘅價值觀，擔心政府當局會因建制派嘅壓力，而改變對通識科嘅睇法，甚至矮化通識教育。
教育局局長楊潤雄回應時話通識科係核心科目，有其獨特角色，可以連繫唔同學科知識，改善以往高中課程偏重學科嘅特點，並經公眾支持同廣泛討論先落實。對於現時專責小組正作出檢討，佢話當局唔會有預設立場，去決定科目係咪會繼續存在。
卓妮