特衰政府出名眼高手低，就講尋日正式生效嘅新酒例吖，表面上係禁止商戶向十八歲以下人士賣酒，防止後生仔女出現酗酒問題，原意係好嘅，但實際上港府做啲唔做啲，幾乎零宣傳，最怕控酒唔成，條例漏洞多多，盞嘥氣嘅咋。
講起呢條新酒例，可以話係姍姍來遲，事關港府早喺二○○○年設立酒牌制度，禁止持酒牌嘅食肆或酒吧喺「處所內」向十八歲或以下人士售賣酒類飲品，不過青少年喺便利店同超市等「處所外」買酒就唔受規管，新例就係為堵塞漏洞而設，違例者最高罰款五萬蚊，聊勝於無喇。
不過咁，港府用咗十八年時間孵蛋咁孵，到頭來都係慢工出劣貨，宣傳嚴重不足。新例實施首日，記者發現除咗大型超市同便利店有喺當眼處貼出通告，列明唔賣酒畀未成年人士，大部分士多都冇貼出告示，老闆仲話對新例唔清唔楚，控煙酒辦亦冇派人通知及講解。當局做嘢是但成咁，求其成咁，事倍功半又有乜出奇。
唔係講笑，新例實施後，控煙酒辦人手由原來嘅八十幾人，增加到一百一十幾人，即係加咗三十人咁大把，弊在全港售酒點多達一萬五千個，千手觀音都搞唔掂。有立法會議員質疑，靠呢區區百零人，連巡查都唔夠人手，莫講話執法。咁又係呀，當年有市民舉報網吧有人吸煙，等咗三日都唔見控煙辦派人執法，家陣控煙又控酒，唔斷擔挑至奇。
仲有呀，當局被問到大行其道嘅任飲任食餐廳，如果將酒類擺出嚟任由客人自行取用，算唔算違法，點知執法部門答案模棱兩可，只係話可能違法，叫餐廳索性收起酒類飲品喎，斬腳趾避沙蟲。連當局都懵盛盛，叫商戶點跟從呀？都仲未講店舖職員到底有冇權力要求顧客出示身份證呢一筆，萬一因為咁而引起爭拗，打工仔都好無辜啫。
至於網購酒類飲品，如何確保收件人是否成年，同埋成年人買酒畀青少年飲用不在法例監管範圍，在在證明條例存在好多漏洞，咁搞法，咪即係形同虛設？再講吖，條例只罰賣酒一方，而唔懲罰買酒嘅未成年人，咁樣係咪公平，有冇阻嚇作用，真係好難唔令人質疑。
都係嗰句喇，港官小事做唔好，大事做唔到，控煙控酒本來都係為市民健康着想，之不過港官做嘢思慮不周，明明係德政，去到佢哋手都會淪為擾民政策。港官冇心冇肺冇靈魂，話唔係貓住咁制訂政策都冇人信喇。咪畀功夫茶批中，控酒新例遲早都係落得雷大雨小嘅下場咋。