政情：陳黎惠蓮唔熟手機 壞親要搵個孫救
今時今日單靠手機都可以接收好多資訊，一機在手真係好重要。保良局先後喺各區成立「長者援手網絡中心」，以幫助唔擅長用電話嘅長者。不過作為保良局副主席嘅陳黎惠蓮就話，自己其實唔係好識用手機，主要都係用通訊應用程式Whatsapp，其他功能都好少用，而每次手機壞咗，都要搵個孫求救喎。
慨嘆科技嘢後生仔熟手啲
陳黎惠蓮話，佢個孫今年十五歲，已經用電話用到好純熟。有次佢個電話係咁震，Whatsapp又冇晒記錄，嚇到唔知點算，點知一搵個孫幫手，撳咗幾下就搞掂，慨嘆科技嘅嘢都係後生仔比較熟手。
講開手機同上網，社會福利署安老服務科助理署長陳德義話，香港人有好多機會上網，理應唔算難學，不過對上咗年紀嘅長者嚟講的確會唔慣同困難，所以好需要一啲網絡中心幫佢哋。至於佢自己用電話就冇乜問題，只係佢年近九旬嘅媽媽就唔係好識喇，所以佢惟有傳統啲，直接打電話畀媽媽咁話。