政情：陳恒鑌愛將鄧麗玲 自覺唔靚女要P圖
畀人叫得做「小花」，都應該有番咁上下姿色，但係有「民建聯小花」之稱嘅立法會議員陳恒鑌嘅地區辦事處社區主任鄧麗玲不單止話自己唔係靚女，仲自爆有P圖（改圖）添！唔係啩？
鄧麗玲日前喺網上上載咗一段短片，短片中嘅佢一開始就邊笑邊話「小花」呢個名係人哋客氣先咁叫佢，佢就自覺唔係靚女，仲直認有P圖。不過佢就話淨係有「加工」皮膚啫，眼耳口鼻就絕對冇執過嘅。短片用得咁嘅開場白都係想「吸睛」，令到多啲人留意佢啫。
做家訪擺街站減肥
短片入到正題，鄧就話以前服務開較多公屋嘅社區，依家轉咗服務私樓同中產較多嘅葵青區，自言初時都好手足無措，惟有一放假就匿埋喺屋企搵資料，睇吓有乜背景類似嘅屋苑個案，等居民有需要協助時都畀到佢哋信心。佢又話，區內有好多年輕人鍾意嘅蒲點，作為年輕人嘅佢只要做番自己，就冇咩話題講唔到。而佢仲因為經常做家訪同擺街站，喺接觸街坊之餘仲減到肥，真係一舉兩得咁話。