政情：建制甩轆失橫洲
元朗橫洲公屋發展項目惹來不少風波，雖然項目早前在立法會嘅事務委員會已經通過咗，但係負責跟進項目嘅小組委員會（小組）工作就仲未完結。尋日小組舉行新一個立法年度首次會議，要選出正副主席，但出席嘅建制派同民主派人數均等，搞到要靠抽籤決定，一向關注橫洲風波嘅議會陣線朱凱廸最終中籤，意外地出任主席。事件揭露建制派議員「佛系」懶懶閒唔齊人，先搞到甩轆要抽籤。
橫洲風波喺二○一六年立法會換屆選舉時發生，之後立法會就成立咗小組跟進事件。事隔兩年，風波都差唔多煙消雲散，而且小組對發展項目都冇實質影響，難免會有建制派形容小組係「雞肋」，當時仲預料上一個立法年度嘅正、副主席麥美娟同柯創盛（柯仔）要繼續「硬食」，直至小組完結為止。
可能因為咁，建制派就放軟手腳。話說喺尋日會議上，兩派議員分別只得四人在場，建制派有麥美娟、柯仔、謝偉銓及邵家輝；而民主派就有朱凱廸、郭家麒、尹兆堅及鄭松泰。據悉政府預先有提醒議員開會，但有建制派人士就否認，所以佢哋順理成章「佛系」開會，可開可不開。
邵家輝嘗試班救兵失敗
當提名麥美娟同朱凱廸競逐小組主席後，邵家輝已經醒水舉晒手想點算開會法定人數圖拖延時間班救兵，仲問投票時係咪會有鐘聲，點知就因為開會法定人數足夠，點唔成人數，最終搞到要主持會議嘅柯仔抽籤抽出主席人選。雖然邵家輝嘗試救火，包括打算拉議員石禮謙入會議室開會，但始終趕唔切，柯仔已經抽籤抽出朱凱廸做小組主席。
不過，到選舉小組副主席時，由於石禮謙已施施然行咗入會議室，令到建制派人數增加一人，所以柯仔以五票擊敗只得四票的尹兆堅，成功連任副主席。據悉，運輸及房屋局亦都知出事，急急Call人開會，而建制派亦乖乖坐齊人，慎防朱凱廸玩嘢，其中議員盧偉國仲建議小組開到明年二月期滿後，唔應該再延續落去添！
朱凱廸：冇諗過延續個會
正當建制派建議封殺小組時，朱凱廸就反駁話自己都冇諗過延續個會，換言之佢嘅主席壽命只得三個月左右。不過，三個月話短唔短，唔知佢期間又玩咩新花樣，睇嚟建制派未來三個月都要乖乖地坐齊人開會畀佢玩喇。