中環出更：兼職素食者孫德基僅午餐食肉
立法會尋日設宴招待政府高級官員同行政會議成員，平時喺會議上唇槍舌劍嘅議員同政府官員就暫時「休戰」輕鬆一下。同立法會政府帳目委員會接觸得多嘅審計署署長孫德基尋日就同幾位帳委會成員同枱食飯，今次佢哋唔使再討論審計報告內容，孫就大談養生之道，仲話自己係兼職素食者添。
帳委會成員之一嘅批發及零售界議員邵家輝話，帳委會尋日已經開咗兩場簡報會，所以午宴即使同孫同枱都放低公事先。邵又爆料話，孫喺席間大談養生，仲話唔好見佢滿頭白髮，其實可以一口氣做到四十下掌上壓。
梁志祥自爆成日睇林正財專頁
孫仲話，自己會多加留意身體，平日仲會去跑步，飲食都好注意，又話自己係兼職素食者，因為只會喺午餐食肉喎。而同邵同枱嘅仲有食物及衞生局局長陳肇始，邵仲把握機會向其反映電子煙及食物糖鹽等事宜，不過對方就因為另有公務，要提早離開。
議員梁志祥就同身兼安老事務委員會主席嘅行會成員林正財一齊離開宴會。向來關注社會福利議題嘅梁就話，平日都有留意林嘅社交網站專頁，睇下有乜最新嘅長者科技產品，又大讚林親身試用產品好過淨係識坐喺冷氣房，而佢遲啲都會去睇吓一啲為臥床長者更換尿片嘅儀器。唔知佢哋兩個會唔會約埋呢？
正式就任立法會議員三日嘅陳凱欣都有出席午宴，曾任食衞局局長政治助理嘅佢，今次可以乘機同舊同事敍舊。佢話好多人都話佢塊面瘦咗，仲有傾吓養聲問題，皆因佢喺選舉期間經常大嗌拉票，搞到唔知係咪聲帶受傷。而同佢同枱嘅就有唔少資深議員，所以就同佢哋交流下加入邊啲立法會事務委員會，果然係把握時間偷師喎。
卓妮