車Cam攝下乘客拋出路中慘況
【本報訊】三屍橫臥路面慘不忍睹！車禍發生時，三名旅巴乘客被拋出車外，其中兩人飛過路中分隔石壆，跌在對面行車線，當場慘死。期間，有「車Cam」片段拍攝得現場恐怖慘況，只見在距離撞爆水管約百米外，水柱飛濺，玻璃碎片散滿一地，當時有車輛急忙停下，但亦有車輛仍然繼續前行，竟然仍從屍體旁邊慢駛而過。其後，救護員趕至立即為死者蓋上紅色毛巾。有目擊者看見此悲慘情景，不禁黯然神傷。
至於肇事旅巴失事前，已有「的哥」感覺到大車禍先兆，他表示：「當時佢（旅巴）車速好快，我都唔敢Cut線，驚畀佢撞！」
行經的哥：旅巴車速快 唔敢Cut線
姓趙的士司機指，當時他由南灣隧道駛出行左一線，涉事旅巴則行左二線，原本他欲切線往左二線，然後駛上青馬大橋前往機場，惟看見旅巴車速很快，他形容：「佢（旅巴）慢我哋架的士唔係好多！」於是打消切線念頭，「我驚Cut埋去會畀佢撞！」並沿左一線前行，期間見到一輛的士打死火燈停車，趙稱：「當時都有喺度諗，架的士咁樣死火好易出事，點知唔夠幾秒真係撞。」
趙指，當時從倒後鏡一看，赫見旅巴已猛撞向的士右邊車尾，發出隆然巨響，「旅巴撞咗車就左搖右擺，舞龍咁舞，的士畀佢推到好前好前。」趙形容他避過一劫「好好彩」，「如果嗰時我Cut埋去左二線，可能我都會有事。」他續稱，車輛駛往機場時，車速普遍較快，尤其事發時是清晨，車流較少，但趙不諱言，旅巴車速一般不會如此快，「佢比平時嘅旅巴快好多好多！」趙又希望死者家屬能節哀順變，傷者大步檻過，當局亦應徹查意外成因。
另有途經「車Cam」攝下撞車一刻，從片段中可見，當旅巴駛近打着死火燈之的士時，未有減速迹象，隨後旅巴突然向右邊扭軚閃避，但仍與的士相撞，的士打「白鴿轉」始停下，旅巴先撞右邊路中分隔石壆，再反彈撼向左石壆，並衝前近二百米。期間撞毀石壆上的消防栓，噴出數米高水柱，旅巴停下時搖搖欲墜，幸未有反車，過程歷時約六秒。