武俠小說入面，小龍女從古墓走到人間，成就一段蕩氣迴腸嘅愛情故事。現實中，教育局官僚一樣好似喺古墓爬出嚟咁款，思維停留喺咸豐年代，不知今夕何夕，制訂嘅政策老土兼過時，蠢到冇朋友。
係咁嘅，教育局興建新校舍嗰陣，會根據「標準校舍用途分配表」及「標準家具和設備參考清單」為新學校提供校舍設施，本來都冇乜好奇怪，但奇就奇在教育局自二○○○年起就冇再公開校舍分配表嘅更新資料，到底局方會為學校提供乜嘢基本設備，連校方都矇查查。更騎呢嘅係，「標準家具和設備參考清單」列出五百多項學校「標準項目」，竟然包括VHS錄影帶、透明膠片高映機、電動打字機連推架、手提卡式錄音機等設備，你話係為學生提供教育工具吖，定係出土文物呢？
喂，家陣係互聯網時代，莫講話呢啲「古董」唔係咁輕易買到，即使買到都係得物無所用，事關今日連幼稚園學生都識上網睇YouTube，仲有邊個會咁老土睇錄影帶、用卡式錄音機呢？正如立法會議員話齋，教育局擺明尸位素餐，敷衍塞責，冇設立機制定期檢討校舍標準及設備清單，搞到清單過晒時、脫晒節，玩殘學校。
咁又係呀，教育局規定，如果學校無法添置或認為不需要清單上嘅物品，必須逐項解釋原因及列明用乜嘢設備取代。校方重置校舍已經忙到一頭煙，仲要花費人力物力做呢啲唔等使嘢，簡直大整蠱。有特殊學校校長仲話，局方清單物品不切實際，例如木製枱櫈會令特殊學生坐得唔舒服，必須改為膠製枱櫈，但因為超出預算，學校要自掏腰包；又例如中央廣播系統至今冇列入清單，學校又係要自行安裝，呢啲咪叫好做唔做囉。
鬼咩，港產官僚個個不食人間煙火，淨係識匿喺冷氣房閉門造車，既愚又懶，唔鬧出笑話至奇。好似教育局一方面積極推動STEM教育，話要配合社會創新發展，另一方面又一本皇曆用到老，咁搞法，教育點會唔亂象叢生吖。
講起教育局嘅爛笑話，真係三日三夜數唔完。最經典梗係局方同港台共同製作嘅教育電視，內容十年如一日，連小學雞都嫌棄，收視慘不忍睹。至於中小學屢爆「影子學生」事件、大量校舍荒廢養蚊等等，在在證明教育局官僚胡混度日。
咁啦，讓上帝歸上帝，撒旦歸撒旦，古墓派歸古墓派。教育局官僚快啲帶埋錄影帶、卡式機返古墓慢慢歎，咪再出嚟獻世兼靠害學生，好冇？