審計署日前發表的審計報告，揭露政府多個部門亂象叢生，當中以亂花公帑、做嘢求其最令人側目，例如驗食品懶懶閒，啲毒菜驗成三個月等市民食晒至公布，認真靠害；造價十億元嘅單車館驚見白蟻兼漏水；年耗十億元公帑嘅香港電台，收視率近乎零。香港特區政府嘅管治水平「全面提升」？老朽欲辯已忘言！
政府有的是錢，肥到着唔到襪，但是否代表各部門就可以任意做「大花筒」？淨係講香港電台，多年來不思改進，兩個電視頻道平均收視率僅○點一點，即約六千四百名觀眾；成本高昂的教育電視收看人數大減；外購節目繞過政府標準程序所設監控機制，先自行出價再與供應商斟洽，而不是邀對方報價，構成合謀風險。
港台的管理漏洞可謂罄竹難書，早年有員工詐騙撰稿及資料搜集服務費，帳目混亂，如今審計署再提合謀風險，無疑暗示港台無視機制，當廉署透明，唔通港台真係「大到不能管」？說來奇怪，港台過去半年的最高收視率才二點二點，黃金時段普遍不超過○點九點，除了用「慘不忍睹」形容，老朽不知道還有甚麼更適合的形容詞，這樣的一個機構，何以政府每年仍肯花十億元經費？再說，港台作為官媒，製作的節目如《頭條新聞》、《城市論壇》等立場偏頗、譁眾取寵，難為佢仲夠膽話其節目係「兼顧少數族裔或小眾趣味」，「不應單以收視率『定英雄』」云云。
港台廢到無倫，可是佢愈廢政府愈愛，不但每年畀佢十億元經費，更一度計劃耗資六十多億元打造港台新大樓。港台一味討好反中亂港勢力及淫媒，但在政府的慣縱下，「養走狗咬主人」變得理曲氣壯，完全違背政治倫理。蘇格拉底說過，認識自己的無知就是最大的智慧。顯然，冇靈魂政府把無知當靈符妙藥，吾人只能乾着急看着香港沉淪！