政情：今日你上鏡：東京電子煙氾濫 嚇親湯修齊
家庭與學校合作事宜委員會主席湯修齊（Henry）最近同太太到日本玩，周圍搵好嘢食，亦趁機去東京涉谷街頭行吓，不過Henry就被通街都有電子煙賣嚇親，影埋相上載到Facebook，而且仲形容整體情況十分可怕，希望香港唔好步日本後塵咁話。
Henry一直好關注電子煙嘅問題，早前公布過八成家長希望政府禁止電子煙嘅問卷調查。上個月佢獲委任為香港吸煙與健康委員會委員，自然更加關注呢個問題喇！佢話喺東京一間著名大型電器商店內發現大量電子煙及加熱煙出售，仲有數以百計嘅鮮果味、薄荷味等充劑，設計精美嘅配件五花八門，好似手機配件咁。行多兩步，又發現一間加熱煙店，入去幫襯嘅都係時尚嘅年輕人。
冀盡快立法禁止
見到咁嘅情況，佢都忍唔住用雙手喺胸前打個大交叉，仲扁晒嘴添！佢話期望立法會議員攞出最高嘅道德勇氣，拿拿聲立法全面禁止電子煙及加熱煙。