政情：首揸旗爆蝦碌 鄺俊宇多謝自己
平時立法會議員喺會上發言時，都會以主席作開首發言，喺發言完畢亦會以「多謝主席」作結尾。新任嘅福利事務委員會主席嘅鄺俊宇（Roy），尋日喺傳媒茶敍時自爆，話習慣咗喺會議上發言完畢都會講「多謝主席」，搞到首次主持會議時都改唔到口，喺講完之後隨即發現有問題，急急加番句「多謝我自己」。
依家立法會有廣播系統，兼有埋手語即時傳譯，阿Roy話事後大樓遇到傳譯員，對方都記得佢，仲同佢講有譯埋「多謝我自己」嗰句添！雖然佢喺○七年已開始做區議員，但係咁多年嚟都未試過做主席，就連立法會事務委員會嘅主席都未做過，可能因為咁，難免會有啲蝦碌。
自製報告派街坊
話說明年就係區議會換屆選舉，阿Roy身為立法會區議會（第二）功能界別，即俗稱「超區」嘅議員，佢都唔敢偷懶，近日唔止自製工作報告，仲落埋區派單張添！佢就透露，依家自己一星期起碼有兩個街站。至於反應如何？佢話唔少街坊都對單張有興趣，一個半鐘頭可以派到一千張，有時仲會有街坊排隊拎添！