中環出更：九西敗選 李卓人密會漢奸黎 疑向金主解畫
立法會九龍西補選塵埃落定，工黨李卓人慘敗，無緣重返議會，佢事後口講民主派要深切反思同檢討，但似乎仍有心情同泛民中人「圍爐取暖」，佢尋晚同兩名民主黨（白鴿黨）前主席何俊仁（AV仁）同李永達（高達），齊集壹傳媒黎智英（漢奸黎）位於何文田寓所密會約兩個半小時。仲記得李卓人早年曾將漢奸黎部分捐款「袋住先」長達九個月捱轟，唔知今次佢同漢奸黎密會，係咪就敗選向「金主」解畫呢？
李卓人喺九西補選落敗後短短三天，就現身漢奸黎寓所，認真耐人尋味。漢奸黎尋日下午約五時十分返到何文田寓所，而喺傍晚七時四十分左右，漢奸黎旗下七人車接載李卓人、AV仁同高達抵達漢奸黎寓所，高達坐車頭駕駛座旁邊嘅座位，李卓人同AV仁就坐中排嘅座位。現場所見，李卓人喺車上神情自若，似乎冇受到補選落敗一事影響。寓所關閘後，三人先至落車，似乎神神秘秘咁。
見咗約兩個半小時
至晚上十時十分，七人車送李卓人、AV仁同高達離開，先送李卓人同高達到旺角警署落車，再送AV仁過海，即係今次密會見咗約兩個半小時。問李卓人今晚同漢奸黎食飯有乜嘢傾，係咪有乜嘢大project（計劃），李卓人就話冇嘢傾。被問到係咪有乜嘢任務布置畀佢哋，李卓人就冇回應。向高達提問同一個問題時，佢就完全冇出聲。
漢奸黎當日拍埋片呼籲泛民支持者撐李卓人，但李卓人依然落敗，甚至比姚松炎參選三月立法會九龍西補選嘅得票更加差。
選舉過咗冇幾耐，漢奸黎就即刻同李卓人、AV仁同高達密會，唔知係咪要解畫呢？
卓妮