西諺有云︰「冇穿冇爛，唔好修理。」用廣東話俗語講，即係一件事Run得好地地就唔好阿茂整餅，冇嗰樣整嗰樣，可惜港產官僚偏偏反其道而行，硬係有本事化神奇為腐朽，市民真係多得佢哋唔少。
《物業管理服務條例》即將生效，當中規定單位數目超過一千五百個嘅屋苑必須聘請持牌管理公司。冇錯，近年嚟關於物業管理嘅投訴同亂象唔少，立例規範化無可厚非，問題係主事官員冇神經冇靈魂，求其拍吓腦袋就定出一千五百呢個數字。好似擁有近二千戶嘅沙田雲疊花園咁吖，之前不滿管理公司收費高兼大花筒，夾錢打官司終止合約，自己屋苑自己管理，搞得有聲有色，管理費平絕同區居屋不特止，仲有儲備幫補街坊搞大維修，簡直恨死隔籬，依家好喇，攞物管公司牌照難度極大，走回頭路請番管理公司又唔甘心，搞到兩頭唔到岸，你話班民政官僚係咪靠害吖。
講你都唔信，當初審議法例嘅時候，民政事務局局長劉江華拍晒心口保證，現時所有由業主自管嘅物業，單位數目都唔超過一千五百個，因此唔會受影響，事實係佢老哥早年喺沙田區打滾，曾鼓勵雲疊班業主自行管理，仲懶熟咁送上墨寶致意，有乜理由唔記得屋苑戶數。人哋就話「屁股決定腦袋」，劉局長坐上高位後直接連個腦都唔見埋，全港仲有幾多類似畸士，真係冇人話得埋，佢老哥民望長期喺一眾司局長中包底，果然實至名歸。
最離譜嘅係，民政署修例甩漏在先，事後補鑊唱慢板在後，話就話會協助法團，實際上一味耍官腔帶居民遊花園，話新嘅發牌制度尚在籌劃中，喺法團自行管理模式安排有更多資料時，會盡快向法團提供喎。唔係啩，連法團自管模式咁基本嘅嘢都未釐清就倉促推出新例，仲兒戲過細路仔玩泥沙。聽講民政署計劃喺附屬法例加設條文，堵塞漏洞，唔該唔好下巴輕輕吖。
話時話，民政官僚食嘢唔做嘢，做嘢打爛嘢，市民早已見怪不怪。第樣唔講，淨係講管理私營骨灰龕一瓣，大量廟宇公然推銷無牌骨灰龕，部分廟宇更變身「麻雀館」，沒有最亂，只有更亂，民政事務局居然放任自流，關人個關。咁都未算吖，深水埗通州街天橋底南亞村淪為罪惡淵藪、吸毒、販毒特區，正正就係因為民政事務總署等六大衙門長期互相扯皮，三個和尚冇水飲。
一葉落知天下秋，香港高官人工福利一流，服務水平九流，民政官僚只係整個特衰政府嘅縮影，可憐納稅人「高薪養廢」，簡直冤過竇娥。