政府日前公布二○一七年香港貧窮情況，貧窮人口直達一百三十八萬，創二○○九年以來新高。政府被轟扶貧不力，愈扶愈貧，當局就死撐係因為人口急速高齡化等因素。不過有學者喺尋日嘅電台節目中反駁，並炮轟政府以搬數字嘅手法減低貧窮率，做法令人氣憤。政府又被批評只視貧窮為抽象數字，缺乏對貧窮人士真正嘅理解、尊重同關心。負責社福政策嘅勞工及福利局局長羅致光人所共知IQ高，但如果只識玩弄數字，而非用心做好滅貧工作，咁就真係抵鬧喇！
