政情：情迷蕾絲手套 詹洪良盼掀復古風
香港浙江省同鄉會聯合會副會長詹洪良（Ivan）家族生產嘅時款手套產量全球最多，一向有「手套大王」之稱。佢話由於智能手機興起，就算戴住仍可以篤手機嘅時款手套已經流行咗一段時間喇，都係時候諗吓玩啲乜嘢新花款。而佢自己就好想可以再興番戴蕾絲手套。
懷念優雅嘅女性美
點解Ivan想興番戴蕾絲手套呢？佢就笑笑口話，女士戴蕾絲手套特別顯得優雅，好似以前香港女士都有戴，上世紀八、九十年代，美國嘅搖滾歌后載歌載舞時，亦都經常穿戴，嗰種優雅嘅女性美都頗令人懷念喎。不過依家潮流興輕便打扮，都無計o架噃。佢就話，希望時裝設計師可以帶頭興番復古風，咁就可以帶旺蕾絲手套喇。
雖然全球暖化嚴重，香港人戴手套保暖嘅機會愈嚟愈少，不過Ivan話自己都仲會戴皮手套o架，之不過係要去好凍嘅地方先至有得戴囉。