政情：盧偉國再露兩手 教整蛋牛通
經常推介「盧家私房菜」、真實身份好可能係大廚嘅工程界立法會議員盧偉國又再露兩手，繼早前分享過自家製「黯然銷魂飯」同「肥燶瘦叉燒」後，佢尋日就回歸基本步，大談早餐點煮煎蛋牛肉通粉，詳細到湯底同通心粉點揀都介紹埋添。
盧偉國介紹佢嘅「盧家私房早餐」煎蛋牛肉通粉時就話，湯底唔使用雞粉或者任何調味粉，而係落蝦米去調味，佢話︰「細個屋企阿媽都係咁落，幾粒蝦米就夠，又夠健康」至於啲牛肉就係喺街市買嘅新鮮牛肉，煎蛋就用日本九州嘅雞蛋，再煎成「燶邊流心蛋」，仲話要有蛋黃汁流出嚟先完美喎。
同檔販交流多 愛上煮食
至於「主角」通心粉方面，佢就最愛細粒、厚肉、光身嗰啲，話大部分茶餐廳都係用呢款，食慣咗呢種爽口嘅口感。而飲品方面，佢就話雖然日本唔出產咖啡豆，但烘焙技術出色，所以都買唔少。佢仲話細個住九龍城時養成行街市習慣，放假都成日同老婆行街市，同啲檔販師奶交流得多，慢慢就愛上煮嘢食喇。