中環出更：鄧以海 曾國衞 自認奶茶控鄧炳強愛齋啡
香港人每朝起身都鍾意飲吓奶茶咖啡提神，原來海關關長鄧以海同入境事務處處長曾國衞都鍾意飲奶茶，佢哋尋日早上出席喺清水灣鄉村俱樂部舉行嘅健康快車慈善跑步行時講起有關健康嘅話題，曾國衞笑稱「最唔健康嘅嘢我齊晒」，包括習慣起身唔食早餐就飲奶茶。而鄧以海就話，好多人都知佢係「奶茶狂」。
曾國衞話佢平時瞓得唔多，只係瞓五小時左右，所以即使以前編更返唔同時間都瞓得着。而佢由細到大都唔食早餐，因為細嗰時，佢爸爸媽媽要工作，所以冇人煮早餐畀佢食，而佢自己都唔會煮個麵喇。至於運動方面，佢依家每星期都去健身室做運動三小時，包括花一小時用跑步機跑步。難怪佢睇落都相當健康。
警務處副處長 鄧炳強昨履新
鄧以海就話佢冇熱奶茶就諗唔到嘢，所以做重要決定前都鍾意飲杯熱奶茶先，又自爆後生時為咗日以繼夜咁做嘢，一日可能飲三、四杯，不過近年就開始飲少咗好多喇，一日可能飲一杯，甚至半杯，始終飲得太多都唔係咁健康咁話。佢尋日參與活動步行時又話，以前入學堂訓練時都有跑大欖涌嗰邊，第一次跑都喘氣，半年後差唔多出班，跑上山來回多一轉都冇問題喇。
同場出席嘅嘉賓仲包括保安局局長李家超及尋日履新嘅警務處副處長（行動）鄧炳強。鄧炳強就話自己怕肥，有時會飲吓齋啡，雖然依家朝早七點返工，晚上六、七點放工，但因為鍾意份工，覺得時間過得好快。
今次活動嘅搞手之一、今日上任清水灣鄉村俱樂部主席嘅王桂壎話，佢同健康快車創會主席方黃吉雯搞咗呢個活動已經八年喇，今次有約二千六百人參與，仲延長咗少少賽程。
卓妮