香港又再揚威國際喇，講緊嘅之唔係本港再發現一宗老鼠傳人戊型肝炎個案囉。香港號稱國際大都市，其實衞生環境比第三世界國家仲要不堪，竟然包辦晒全球首宗同第二宗鼠傳人肝炎個案，簡直係奇恥大辱，官老爺知唔知個醜字點寫㗎？
你話吖，香港喺九月底至爆出全球首宗鼠傳人戊肝，唔夠兩個月，衞生署又喺黃大仙區發現一宗新個案，今次呢位患者喺舊年五月出現腹痛、頭痛、厭食、疲倦同心悸等病徵，入住廣華醫院接受治療，雖然幾日後出得院，以為冇事，點知港大回顧番呢個病人嘅庫存樣本，至發現到大鼠戊型肝炎病毒。即係話，鼠傳肝炎病毒早喺舊年已經喺黃大仙區出現，係咪已經擴散去其他地區，家陣有幾多潛伏但未發現嘅個案，真係冇人話得埋。
鼠傳肝炎爆完一宗又一宗，講到尾都係呢個政府胡混度日，縱鼠為患。好簡單，全港區區都有鼠患投訴，啲老鼠光天化日下成群結隊出嚟搵食，招搖過市，唔止大過隻貓，仲要唔怕人，市民、旅客被鼠咬嘅報告接二連三，出現鼠傳人類病毒有乜出奇吖。話時話，其實舊年已經有元朗居民感染由老鼠引起嘅漢坦病，又有家庭主婦感染鈎端螺旋體病，家陣驚爆鼠傳肝炎，鑊鑊新鮮鑊鑊甘，話市民唔驚就假。正如專家所講，只得一宗鼠傳人戊肝，都仲可以當係意外或者不幸，當有兩宗嘅話，再唔加強滅鼠，個案一定陸續有來。
係人都知，老鼠、曱甴、烏蠅同蚊係出咗名嘅「四害」，係傳播各類疾病嘅源頭。照咁睇，港官放任蛇蟲鼠蟻為禍，好明顯就係「第五害」。大家有眼睇，港府唔止使用咸豐年嘅滅鼠方法，仲用「老鼠好聰明」嚟為滅鼠無能開脫，食環署員工更一再被傳媒踢爆返工期間偷懶「蛇王」，呢啲咪就係「蛇鼠一窩」嘅寫照咯。話就話香港有個防治蟲鼠組，實情係「保護蟲鼠組」，如果唔係，香江老鼠都唔會多過人，早前亦都唔可能大規模爆發本地感染登革熱個案，搞到香港精神象徵嘅獅子山公園都要封閉差唔多兩個月喇。
講起都唏噓，以前香港係大名鼎鼎嘅亞洲四小龍，東方之珠風采照人，回歸後唔單止星光黯淡，各種奇病怪症仲長爆長有，全球首例禽流感、沙士重災區、亞洲首宗豬流感，加埋佔中、旺暴，香港只能以醜聞維持喺國際上曝光度，你話死唔死？
學古人話齋，一室之不掃，何以掃天下？港府連蚊、老鼠等害蟲都滅唔到，仲大諗頭到話要填海造島、參與大灣區及一帶一路喎，搵鬼信咩！