政情：骨醫高永文 唔介意病人用中醫療法
食物及衞生局前局長高永文係西醫系統出身，但原來佢對中醫藥亦有濃厚興趣。尋日浸會大學頒授榮譽博士學位畀佢以作表揚，佢自爆爸爸以前喺廣州擔任藥房掌櫃，所以佢自小就對中醫藥略有認識。雖然求學時期香港未有中醫嘅全科培訓，但佢仍然於公餘時間，到港大專業進修學院修讀中醫課程。
後來政府通過中醫藥條例之後，高永文亦有份協助浸大成立中醫藥學院，同埋成立中西醫學交流組織「中西醫結合學會」並擔任第二屆會長。
以病人利益行先
高永文話，中西醫學雖則理論各異，但兩者結論一樣，目的都係治病。所以佢自己身為骨科醫生，只要唔涉及開刀嘅話，病人鍾意喺外面做針灸或推拿等中醫療法，佢都唔介意。佢又話中西醫唔應該有門戶之見，而係要結合兩家之長，一切都應該以病人利益着眼咁話。