政情：老鴿再接棒 傳柴文瀚移民棄選
民主黨（白鴿黨）下月將會舉行兩年一度中委會改選，呢排各地區支部亦密鑼緊鼓搞改選。該黨港島區支部前日選出新一屆部委，由現年六十五歲創黨元老謝志興出任主席。而剛卸任嘅南區區議員柴文瀚冇再出任支部任何職位，有傳佢做埋今屆區議會後將交棒，並將移民外地。
提名謝志興接手
柴文瀚自○三年起出任南區區議員，亦擔任咗六年嘅支部主席。今年換屆選舉，柴冇角逐支部任何職位，反而提名謝志興接手，有傳係因為柴已經對香港冇乜留戀，亦無打算放棄英國國籍，打算做完呢一屆就唔玩，準備移民離港。不過就算咁，佢都可以搵新人頂上，點解搵個創黨元老接棒，唔通白鴿黨內已後繼無人？
柴回覆查詢時話，自己做咗好耐支部主席，係時候換吓人，而未來兩年係選舉年，謝係好有經驗嘅前輩，希望可以幫到支部發展。對於係咪交棒同移民？佢冇否認，只係話考慮緊，咩都有可能，不過點都做到今屆任期尾喎。