政情：10分鐘生活圈 沈豪傑得閒同老婆拍拖
好多人都會因為忙而照顧唔到小朋友，元朗區議會主席沈豪傑早前同太太黃巧欣（Careen）出席一個活動時，講起有個共同工作，就係每朝早要送阿仔返學，仲會睇吓邊個得閒就接阿仔放學。兩人工作都好忙，但仲可以間唔中抽時間去睇戲，沈豪傑話係因為佢安排咗「十分鐘生活圈」，奉行「唔好浪費人生喺交通工具上面」嘅哲學喎！
阿仔都喺樓下返學
沈豪傑話，啲人成日講一小時生活圈，但係對佢嚟講都係太遠。佢將所有嘢都安排晒喺屋企附近，例如阿仔就喺屋企樓下返學。身為律師嘅Careen都係一樣，佢嘅律師樓都喺元朗。Careen又講起，個仔黐爸爸多啲，自己都好樂意咁樣，因為一齊出街食飯時，阿仔去洗手間都要跟住爸爸，自己就可以施施然咁話。