政情：國際評級連續18年攞C 平機會香港之恥

國家人權機構全球聯盟話，全球一百二十個人權機關中，只有十個係被評為C級。換言之，平機會喺全球嘅排名中係最尾嗰十名！更甚嘅係，呢個評分由二○○○年開始至今都冇變過，即係平機會連續十八年「蟬聯」榜尾。

民主黨議員林卓廷都好關注平機會嘅表現，認為平機會被評為C級係香港之恥，係長期唔合格。又話平機會成員目前係由政府委任，有礙佢嘅獨立性，而且過往處理個案極少，行政又混亂，認為政府應該將該會嘅遴選制度交畀多個民間團體組成嘅獨立委員會，令平機會可進一步獨立於政府之外，相信咁樣可以令平機會嘅運作有所改善。

懶理少數族裔被歧視

香港目前現行嘅反歧視條例一共有四條，包括性別、種族、殘疾及家庭崗位嘅歧視。平機會曾經被指摘只係睇重同性婚姻、性小眾嘅議題，冇乜留意其他反歧視條例，更加唔好講跟進相關嘅改善工作。有團體就話，近年網絡、社交媒體上出現好多歧視少數族裔嘅言論，甚至有人打電話畀少數族裔嘅僱主，問佢哋點解要聘請少數族裔。兩年前該團體已經向平機會反映有關問題，但平機會都只係愛莫能助，根本幫唔到少數族裔，令佢哋受歧視嘅情況日益嚴重。

陳章明上任 愈做愈衰

一向乏善可陳嘅平機會，並未因為陳章明上任而省亮蒙塵嘅招牌，反而愈抹愈黑。佢一上任即風波不斷，包括曾指性傾向歧視立法不可取，但後來又改口話有關立法工作刻不容緩。佢又曾被指喺嶺南大學工作期間，未有申報秘撈工作，仲發信畀關注同志平權工作嘅學者，指認識其上司，被批評有恐嚇之嫌。

嚟到任期尾聲，外界都費事邀請陳章明出席同爭取平權有關嘅活動，好似早前立法會議員陳志全喺一個同志平權活動上，就暗批陳章明係花瓶，所以連邀請佢出席都慳番，情況罕見。難怪平機會畀人鬧毫無寸進喇！